Í Héraðsskjalasafni Þingeyinga er að finna skjalið E-1364/2 – Þingeyskir Vesturfarar á árunum 1860 til 1920. Skjalið er 600 bls. rit Eysteins Tryggvasonar jarðeðlisfræðings sem inniheldur nöfn 2.377 Þingeyinga sem flutti til Vesturheims á tímabilinu 1860 til 1920.

Þingeyskir Vesturfarar á árunum 1860 til 1920

Þingeyskir Vesturfarar á árunum 1860 til 1920.

Í formála sem Eysteinn skrifar segir hann:

„Á æsku árum mínum í Þingeyjarsýslu heyrði ég oft talað um fólk sem hafði flutt til Vesturheims. Yfirleitt var þetta fólk sem ég þekkti ekki, enda hafði það farið „vestur“ eins og sagt var löngu fyrir mína daga, og ekki komið aftur til Íslands. Það var eins og einhver dulúð lægi yfir þessum „vesturförum“ ofurlítið í ætt við þá dulúð sem liggur yfir álfum og afturgöngum, sem flestir sáu aldrei, þó aðrir sæju þá í hverju skúmaskoti. Þegar ég hafði lokið minni „starfsævi“ og hafði meðal annars flutt til Vesturheims og búið þar í 13 ár og komið aftur til Íslands … fór ég að safna upplýsingum um þá Þingeyinga sem fluttu brott af Íslandi til Vesturheims á árunum 1860-1920, en á því tímabili flutti umtalsverður hluti íslensku þjóðarinnar til Ameríku í þeim yfirlýsta tilgangi að skapa meiri möguleika til framtíðar fyrir sína afkomendur“.

Eysteinn Tryggvason fæddist á Litlulaugum í Reykjadal, S-Þing. 19. júlí 1924. Hann er kvæntur Guðnýju Jónsdóttur frá Húsavík.

Eysteinn er stúdent frá Menntaskólanum á Akureyri 1946 og er með “Cand. Real” gráðu í veðurfræði frá Háskólanum í Osló og “Fil. Lic.” gráðu í jarðskjálfafræði frá Háskólanum í Uppsölum. Eysteinn starfaði sem veðurfræðingur og deildarstjóri jarðeðlisfræðideildar á Veðurstofu Íslands 1952-1962. Hann var kennari í jarðeðlisfræði við Tulsa Háskóla í Oklahoma, Bandaríkjunum 1962-1975. Kennari (Dósent) í jarðeðlisfræði við Háskóla Íslands 1975-1977. Sérfræðingur í eldfjallafræði við Norrænu eldfjallastöðina í Reykjavík 1977-1994.

Héraðsskjalasafn Þingeyinga